🧰 Preparar o ordenador

Como despois usaremos Flutter, instalaremos Flutter, que xa inclúe Dart, e traballaremos con Visual Studio Code e a extensión Flutter (que tamén instala a extensión Dart).

Segue a guía oficial de instalación de Flutter – https://docs.flutter.dev/get-started/install ou os apuntamentos do primeiro tema de Flutter. Abre unha terminal e comproba a instalación:

flutter doctor
dart --version

flutter doctor indica se falta algún compoñente para desenvolver con Flutter. Para estes programas de consola precisamos que o comando dart funcione. Se non se recoñece, revisa o PATH segundo a guía de instalación.

Se só precisases Dart, tamén existe a instalación independente do SDK – https://dart.dev/get-dart.

📁 Crear un proxecto de consola

Na terminal, sitúate no cartafol onde gardas os proxectos. Executa estes comandos para crear o proxecto e entrar no seu cartafol:

dart create apuntes_dart
cd apuntes_dart

Unha vez dentro, abre o proxecto en Visual Studio Code:

code .

O punto (.) indica que queremos abrir o cartafol actual.

O programa inicial está en bin/apuntes_dart.dart. Substitúe o seu contido polos exemplos que queiras probar e execútao desde a terminal integrada:

dart run bin/apuntes_dart.dart

Para os exercicios con teclado usaremos a terminal integrada, onde podemos escribir as respostas. O panel de saída do editor non serve para introducir datos.

Dous comandos útiles, executados dentro do proxecto:

dart format .
dart analyze

O primeiro ordena o formato do código; o segundo busca erros e avisos.

🌐 Practicar en DartPad

DartPad – https://dartpad.dev permite probar exemplos no navegador. Nos apuntamentos atoparás visores co código que podes executar e modificar.

Os exemplos con dart:io e stdin execútanse no ordenador, non en DartPad. O navegador non admite esa biblioteca.

📚 Consulta: crear un programa de consola – https://dart.dev/tutorials/server/get-started e bibliotecas admitidas en DartPad – https://dart.dev/tools/dartpad.