Antes de comezar a desenvolver software para algún destes dispositivos, é necesario ser conscientes das limitacións coas que nos podemos atopar nestes aparellos. Cales son as restricións ás que nos imos a ter que enfrontar?

Limitacións

Algunhas destas restricións son:

• Subministración de enerxía limitada (normalmente dependente de baterías).
• Necesidade de equilibrar rendemento, consumo de enerxía e temperatura do dispositivo.
• Memoria e capacidade de procesamento moi diferentes segundo a antigüidade e a gama do dispositivo.
• Conexión á rede intermitente, con velocidade e latencia variables ou cun custo asociado ao consumo de datos.
• Pantallas de dimensións, orientacións, densidades e formatos moi variados.
• Interacción principalmente táctil, menos precisa que a realizada cun rato, e ausencia habitual dun teclado físico.
• Interrupcións frecuentes causadas por chamadas, notificacións, cambios de aplicación ou bloqueos da pantalla.
• Restricións á execución de tarefas en segundo plano impostas polo sistema operativo para aforrar enerxía e protexer a privacidade.
• Necesidade de solicitar permisos para acceder á cámara, localización, micrófono, contactos e outros recursos sensibles.
• Diversidade de versións do sistema operativo e de capacidades de hardware.
• Necesidade de garantir a accesibilidade en diferentes condicións de visión, audición, mobilidade ou comprensión.

Este tipo de restricións, e algunhas outras que dependerán de cada dispositivo en concreto, deberán terse moi en conta á hora da análise e do deseño dunha aplicación móbil. Unha aplicación pode ofrecer unha funcionalidade semellante á dun programa de escritorio, pero a súa interface, o seu fluxo de traballo e o uso dos recursos deben adaptarse ao dispositivo e ao contexto de uso.

Vantaxes

Doutra banda, non todo vai ser restricións. Tamén haberá que ter en consideración que esta tecnoloxía vai achegar unha serie de vantaxes moi importantes:

• Mobilidade
• Pouco peso
• Pequeno tamaño
• Facilidade para o transporte
• Conectividade mediante redes móbiles, wifi, Bluetooth, NFC e outros sistemas de comunicación.
• Acceso a sensores como GPS, cámaras, acelerómetro, xiroscopio, magnetómetro ou sensores biométricos.
• Posibilidade de ofrecer servizos personalizados e adaptados á localización e ao contexto do usuario.
• Dispoñibilidade inmediata e capacidade para recibir notificacións.