---
title: 📘 Introdución a Dart
description: "## 🚀 Que imos facer? - **Dart** é a linguaxe coa que escribiremos o código. - **Flutter** permítenos usar Dart para crear aplicacións e deseñar a súa interface. Primeiro aprenderemos a gardar datos, tomar decisións e organizar o código en…"
url: "https://www.drodicio.com/docs/dart/comezando-con-dart/introducion-3/"
updated: "2026-09-24"
category: Tema 1. Comezando con Dart
---

# 📘 Introdución a Dart

## 🚀 Que imos facer?

- **Dart** é a linguaxe coa que escribiremos o código.
- **Flutter** permítenos usar Dart para crear aplicacións e deseñar a súa interface.

Primeiro aprenderemos a gardar datos, tomar decisións e organizar o código en funcións.

![](https://www.drodicio.com/wp-content/uploads/2026/09/dart_logo.webp)

Neste tema faremos programas de consola: mostran mensaxes e len o que escribimos na terminal. No Tema 2.2 veremos clases e obxectos. Despois empregaremos todo isto en Flutter.

> 📚 Consulta: [documentación oficial de Dart - https://dart.dev/guides](https://dart.dev/guides).

## ✨ Características principais de Dart

### 🔤 Sintaxe clara e familiar

A sintaxe de Dart parécese á de Java, JavaScript ou C#. Se xa coñeces algunha destas linguaxes, moitas estruturas resultaranche familiares.

### ✅ Type-safe: tipado estático e seguro

Cada variable ten un tipo que determina os valores que pode gardar. Dart comproba os tipos antes de executar o programa, o que axuda a detectar erros.

### ✅ Inferencia de tipos

Non sempre temos que escribir o tipo: Dart pode deducilo a partir do valor inicial. Isto chámase **inferencia de tipos**.

```dart
var nome = 'Diego'; // Dart deduce que o tipo é String.
nome = 'Rosa'; // Podemos asignarlle outro texto.
// nome = 25; // Erro: esta variable non admite números.
```

### 🛡️ Seguridade fronte a valores nulos

Por defecto, unha variable non admite `null`, que representa a ausencia dun valor.
 Se necesitamos permitilo, engadimos `?` ao tipo. Estes tipos chámanse **tipos anulables**, é dicir, tipos que admiten `null`.

```dart
String nome = 'Diego'; // Non admite null.
String? telefono; // Admite null: aínda non temos un teléfono.
```

### 🧩 Orientación a obxectos

Dart permite organizar o código en clases e obxectos, que agrupan datos e accións relacionadas. Aprenderemos a utilizalos no Tema 2.2.

### ⏳ Programación asíncrona

Dart permite traballar con operacións que tardan en rematar, como pedir datos a un servidor. Para iso empregaremos `Future`, `async` e `await`, que veremos máis adiante.